په دایکنډي ولایت کې د ښوونکو او مامورینو د ارزونې ورکشاپ جوړ شو
د دایکنډي ولایت په پاتو ولسوالۍ کې د مدارسو او ښوونځیو د ۳۸ تنو منسوبینو لپاره د ښوونکو، استادانو او ملکي خدمتونو د چارواکو فعالیت ارزونې لپاره د نویو لارښوونو د تشرېح په اړه یو ورځنی روزنیز ورکشاپ ترسره شو.
یاد ورکشاپ د دایکنډي پوهنې ریاست د اداري اصلاحاتو کارکوونکو لخوا د دغه ولایت د پوهنې رئیس محترم مولوي شیر محمد صدیقي په ګډون تنظیم شو.
د پوهنې رئیس په خپله وینا کې د پوهنیزو موخو ترلاسه کولو لپاره د مدیرانو او ښوونکو مسئولیت او حساب ورکول اړین وګڼل او د تعلیمي پروګرامونو او لارښوونو په رڼا کې یې د پوهنې وزارت د قوانینو او کړنلارو پر بشپړ پلي کولو باندې ټینګار وکړ.
په همدغه پروګرام کې ګډون وال د لارښوونو د معیارونو او پلي کولو سره بلد شول، ترڅو وکولی شي د ارزونې پروسه تر خپل مدیریت لاندې په ښوونځیو کې تطبیق کړي.
