په غزني ولایت کې د یو باب لېسې د ودانۍ لپاره د بنسټ ډبره کېښودل شوه
د پوهنې وزارت له لوري، د غزني ولایت جاغوري ولسوالۍ اړوند په حیدر کلي کې د «حیدر لېسې» د بنسټ ډبره، د یاد ولایت د پوهنې مشرتابه، دیني علماوو، د سیمه ییزو ادارو مسئولینو او قومي مخورو په ګډون د یو لړ مراسمو په ترڅ کې کېښودل شوه.
په پام کې ده، د یادې لېسې ودانۍ چې ١٢ درسي ټولګي، يوه اداري خونه، تحویل خونه، لوبغالی او نور اړین محلقات به ولري، په دوه جرېبه ځمکه کې جوړه شي.
د جاغوري ولسوالۍ د پوهنې آمریت د معلوماتو له مخې: د يادې ودانۍ په جوړېدو سره به د یادې ولسوالۍ ٤٠٠ تنو ماشومانو ته د زده کړو مناسب چاپېریال برابر شي.
د لېسې د دغه ودانۍ ټول لګښت ۵ ميليونه افغانۍ اټکل شوى، چې د يادې ولسوالۍ د معارف دوسته خلکو او سوداګرو له خوا تمويلېږي.
د پوهنې وزارت مشرتابه په داسې حال کې چې د پوهنې د بډاینې لپاره د خلکو مرستې مهمې ګڼي، د غزني ولایت د جاغوري ولسوالۍ د علم پروره خلکو له مرستو مننه کوي.
