په غزني ولایت کې د یو باب ښوونځي د رغولو چارې پیل شوې
د غزني ولایت په خواجه عمري ولسوالۍ کې د سلطان مسعود لېسې د جوړېدو چارې چې نیمګړې پاتې شوې وې، نن یې د ۷ میلیونو افغانیو په لګښت سره د رغولو چارې پیل شوې.
د یاد ولايت پوهنې رئيس الحاج مولوي ميرنصير احمد حسيني، د همدې پروژې د پرانیستې پر مهال وويل: د دغه ښوونځي د جوړېدو چارې شاوخوا ۱۵ کاله وړاندې پيل شوې وې، چې د ځينو ستونزو له امله يې يوازې ۳۰ سلنه چارې پرمخ تللې وې، چې اوسمهال د پوهنې وزارت د مشرتابه د پاملرنې له امله یې د رغولو چارې بېرته پیل شوې.
نوموړي وويل: د پلان له مخې د ياد ښوونځي په رغنیزو برخو کې د ١٦ درسي ټولګیو له ټولو ملحقاتو او لوازمو سره جوړول شامل دي.
اوسمهال په دغه ښوونځي کې ۷۰۰ زده کوونکي په زده کړو بوخت دي، چې په دې سره به دوی ته د زده کړو خوندي چاپېریال برابر شي.
د يادونې وړ ده، چې تېر کال د پوهنې وزارت له بودیجې او د همکارو بنسټونو په مرسته، په غزني ولايت کې ٥٠ بابه ښوونځي ترميم او رغول شوي او په پام کې ده، چې سږ کال په یاد ولايت کې ٥٠ بابه نور ښوونځي هم ترميم شي.
