په ولایاتو کې د پوهنې د ریاستو فعالیتو ته کتنه
کاپیسا:
د کاپيسا ولايت د نجراب ولسوالۍ د پوهنې رياست مياشتنۍ غونډه د دې ولايت د پوهنې رئيس مولوي الحافظ محمد فريد جواد حقاني په مشرۍ جوړه شوه. د غونډې په ترڅ کې د نوي تعلیمي کال لپاره د یاد آمريت پر اداري او تدریسي پروګرامونو باندې خبرې وشوې همدارنګه د ياد رياست مشرتابه ددې ولسوالۍ د تعليمي وضعيت د ښه والي په موخه يو لړ لارښوونې وکړې.
ننګرهار:
د ننګرهار ولایت د پوهنې رئیس مفتي حبیب حضرت حقاني په مشرۍ د دغه ولایت د ۲۲ ولسوالیو د پوهنې آمرینو په ګډون کاري غونډه ترسره شوه.
په دې غونډه کې د ښونې او روزنې اړوند موضوعګانو، اداري او تدریسي چارو د ښه والي، د مراجعینو د کارونو پر وخت اجرا کول او داسې نورو موضوعاتو باندې هم خبرې وشوې.
دایکندي:
د دايکنډي د پوهنې رياست د کارکوونکو لپاره د فقهې درسونه، الهي احکام او ديني درسونه پيل شول.
د دې ولايت د پوهنې رييس مفتي رحمت الله مدثر د ديني زده کړو پروګرام د مامورينو لپاره ګټور او ارزښتناک وباله او له هغوى يې وغوښتل چې د ژوند په ټولو پړاوونو کې تقوا ولري.
غزني:
د غزني د پوهنې ریاست د بنسټيزو څانګو د آمرینو او مدیرانو کاري او اداري غونډه د دې ادارې د رئیس مولوي محمد منیر منصور په مشرۍ جوړه شوه.
په غونډه کې پر مهمو موضوعګانو لکه د بودیجې لګښت، د ښوونځیو جوړول، د درسي کتابونو د کمښت د ستونزې حل، د کارکوونکو د معاشونو پر وخت ویش او په ځانګړي ډول لیرې پرتو سیمو ته د زده کړو په برخه کې لازمې لارښوونې وشوې.
لوګر:
د لوګر د پوهنې ریاست یوه پلاوي د شاه خلوتي، پادخواب شاني او فیض کارېز لېسو د نصاب له تطبیق څخه لیدنه وکړه.
په دې غونډه کې د ښوونکو تدریسي میتودونه و ارزول شول او د هغوی پر ستونزو باندې تمرکز وشو.
