په پکتیکا ولایت کې د یوې مدرسې د بنسټ ډبره کېښودل شوه
د پکتيکا ولايت په مرکز ښرنه ښار کې د ځایي خلکو په مالي لګښت، د نجم المدارس ديني مدرسې د بنسټ ډبره کېښودل شوه.
هغه مراسم چې په همدې موخه جوړ شوي وو، پکې د یاد ولایت والي، پوهنې مشرتابه، د دولتي او خصوصي ادارو مسئولینو، علماوو او قومي مشرانو ګډون درلود.
د پکتیکا والي الحاج مولوي فیض الله جمال حقاني او د پوهنې رئیس الحاج مولوي عبدالقیوم فاروقي په خپلو خبرو کې، د پوهنې په تړاو دخلکو له دې نېک احساس او همکارۍ څخه د مننې او قدردانۍ ترڅنګ، په ټولنه کې د خلکو د ښوونې او روزنې او اصلاح په تړاو، د دیني علماوو او مدارسو په رول او اهمیت تفصیلي خبرې وکړې.
ورپسې د سیمې د خلکو یوه استازي، د ښوونځيو او ديني بنسټونو د جوړولو او پر ټولنه يې د اغېزو په اړه خبرې وکړې او د یاد ولايت د پوهنې رياست له پروګرامونو يې خپل ملاتړ څرګند کړ.
د يادونې وړ ده، چې له دې وړاندې یادې دیني مدرسې ودانۍ نه درلوده او زده کوونکو يې تر شنه آسمان لاندې په آزاده فضا کې زده کړې کولې، چې د نوې ودانۍ په جوړېدو سره به يې د زده کړې د ځاى ستونزه حل شي.
