کندهار ولایت کې څه د پاسه ۱،۵ مېلیونه افغانیو په لګښت د یو باب ښوونځي رغنیزې پروژې پرانیستل شوې
د کندهار ولایت پوهنې ریاست په خبرپاڼه کې راغلي دي: د یاد ولایت ډنډ ولسوالۍ اړوند د رمباسي عالي لېسې لپاره یو شمېر پروژې، چې پکې د لمریزې برېښنا سیسټم، د ۱۰۵ متره ژوروالي سره د یو حلقه څاه کیندل او نور اړین ملحقات شامل وو، د یو همکار بنسټ په مالي ملاتړ د یو مېلیون۵۹۴ زره افغانیو په لګښت بشپړې او ګټې اخیستنې ته چمتو شوې. ويناوالو د همدغو پروژې په بشپړېدو خوښي څرګنده او د هېواد د ماشومانو لپاره يې د لازمو آسانتياوو برابرولو په برخه کې د پوهنې وزارت له کړنو څخه مننه وکړه. پوهنې وزارت د ښوونیزو بنسټونو له مرستو او همکاریو خوښ دی او د دوی د فعالیتونو ستاینه کوي.
