د کابل ښار ښوونځیو او مدارسو د زده کوونکو لپاره د علمي سفر پروګرام ترسره شو
د پوهنې وزارت د ځانګړي پلان پر بنسټ، د استعدادونو د ودې، له یو بل سره د لیدنې او د نظریاتو د تبادلې په موخه، نن سهار د کابل ولايت پغمان ولسوالۍ په معارف باغ کې د ښوونځیو او مدارسو د شاوخوا ۲۰۰ تنو زده کوونکو لپاره د علمي سفر پروګرام داير شو.
په ياد پروګرام کې چې نن سهار پيل شو، د پوهنې وزارت د ښوونې او روزنې معين الحاج مولوي سخاء الله سعيد، د کيفيت تضمين معين الحاج مولوي عبدالخالق صادق، د سرچينو او ادارې معين مولوي صبغت الله وصيل، د دارالعلومونو رئيس مولوي عبدالقدوس قدوسي، د کابل ښار پوهنې رئیس قاري عبدالباسط حقاني، د نشراتو او عامه اړیکو رئیس قاري منصور احمد حمزه، د دعوت او ارشاد رئیس مولوي جمعه خان سروري، د ښوونيزو ناحيو یو شمېر آمرينو، د ښوونځیو او مدارسو ښوونکو ګډون درلود.
غونډه د الهي کلام د څو مبارکو آیتونو په تلاوت سره پیل شوه. ورپسې د کابل ښار پوهنې رئیس د ياد ښوونیز پروګرام میلمنو ته ښه راغلاست ووایه او د دې ډول پروګرامونو په ګټو یې خبرې وکړې.
نوموړي د زده کوونکو د جسمي او فکري استعدادونو د پراختیا، د دوستۍ د پیاوړتیا او د دوی ترمنځ د علمي موضوعاتو او تجربو د تبادلې په موخه د ښوونیزو او تفریحي کړنو په اړه تفصيلي خبرې وکړې.
همدارنګه، د پوهنې وزارت محترمو معينانو او نورو ویناوالو هر یو په خپلو خبرو کې د ځوانانو د علمي کچې پر لوړوالي او د هغوی پر سالمې روزنې ټينګار وکړ.
د غه راز هغوی د هیواد له ځوانانو څخه وغوښتل چې خپل وخت د دیني او عصري علومو زده کړو ته ځانګړی کړي.
د پوهنې وزارت د کیفیت تضمین معين الحاج مولوي عبدالخالق صادق، د خپلو خبرو په یوه برخه کې د ټولنې په اصلاح کې د پوهنې رول ته اشاره وکړه او ټینګار یې وکړ چې د پوهنې وزارت ژمن دی تر څو د معاصرو زده کړو په ډګر کې د ټول هېواد د بچيانو لپاره د ديني او عصري علومو آسانتیاوې برابرې کړي.
د علمي سفر ياد پروګرام چې د پغمان ولسوالۍ اړوند د معارف په باغ کې جوړ شوی ؤ، پکې د کابل ښار اړوند ښوونځيو او مدارسو د زده کوونکو له لوري د حمدونو او حماسي ترانو په ويلو سربېره، هغوی لاسي صنايعو ، سپورتي لوبو، جمناستيک او د پاکې طبيعي هوا څخه په استفادې سره پای ته ورسېد.
د پروګرام ګډون والو د سالمې روزنې او د استعدادونو د ودې او د هغوی د بدني روغتیا د ساتلو په برخه کې د پوهنې وزارت د رهبرۍ له پاملرنې مننه وکړه او د نورو زده کوونکو لپاره یې هم د ورته پروګرامونو د تر سره کولو غوښتنه وکړه.
