له ولایتونو څخه د پوهنې لنډ خبرونه
نیمروز
د پوهنې وزارت د پلان او پالیسۍ ریاست درې کسیز پلاوي د ښوونیزو بنسټونو د بستونو د عادلانه وېش د تنظیم په موخه نیمروز ولایت ته ولاړ.
د دغه ولايت د پوهنې رئيس د يادې ادارې ټولو مسوولينو ته لارښوونه وکړه، چې له راغلي پلاوي سره مرسته وکړي.
نورستان
د نورستان ولایت د پوهنې رئیس مولوي تاج محمد مطمین په ختیځ زون کې د سویډن موسسې له استازي غلام یحیی خادم سره وکتل.
نوموړي د دې ليدنې پر مهال د دغه ولايت د پوهنې ستونزې د يادې شوې ادارې له پلاوي سره شريکې کړې او په دې برخه کې يې د يادو شويو ستونزو د حل او مرستو غوښتنه وکړه.
بل خوا د يادې ادارې استازي ژمنه وکړه، چې يادې ستونزې به له مرکزي دفتر سره شريکې کړي او د حل په موخه به يې اقدام وکړي.
کندهار
په جنوبي زون کې د یونیسف د سیمه ییز دفتر په مالي مرسته د کندهار ولایت د ډنډ ولسوالۍ د پوهنې آمریت د سولري برېښنا په سیستم سمبال شو.
د دې ولسوالۍ د پوهنې آمر د يادې موسسې ستاينه وکړه او زياته يې کړه: د دغه سيسټم په نصبېدو سره د پوهنې آمریت د برېښنا د نشتوالي ستونزې هوارې شوې دي.
سرپل
د سرپل ولایت په ګذرشاهانو سیمه کې د ابوحنیفه (رح) له مدرسې څخه ۱۵۰ تنو فاضلان او د قرانګریم حافظان فارغ شول، چې د دغو فاضلانو د فراغت په پار د دې ولایت د پوهنې د مسوولینو او د سیمه ییزو ارګانونو خپلواکې ادارې، علماوو او د خلکو د استازو په حضور کې ستره غونډه نېول شوې وه.
ګډونوالو د مبارکۍ ترڅنګ په ټولنه کې د دغو فاضلانو د مسوولیتونو په باب ټینګار وکړ.
د نورو خبرونو له مخې:
شپږ ورځنی ښوونیز سیمینار چې څه موده وړاندې د ګوسفندي ولسوالۍ د ښوونځیو د مدیرانو او ښوونکو د ظرفیت لوړونې په موخه د دې ولایت د پوهنې ریاست له لوري د مدیریت او میتودولوژۍ په برخو کې جوړ شوی و، ګډونوالو ته د سندونو په وېشلو سره پای ته ورسید.
