له ولايتونو څخه د پوهنې خبرونو انعکاس

لغمان

د لغمان ولایت پوهنې رئیس مولوي شاه جهان ساجد او د يادې ادارې د انجنيرانو ټېم، د ياد ولایت د دولت شاه ولسوالۍ د فراشغان په کلي کې د کرک لېسې د بیارغاونې له چارو څخه څارنه وکړه او د ساختماني شرکت له مسئولينو یې وغوښتل، ترڅو د يادې پروژې چارې په سمه بڼه د قرارداد له مخې ترسره کړي.

پکتیکا

په پکتيکا ولايت کې د واليبال سيالۍ د ياد ولايت د پوهنې او فرهنګ رياستونو له لوري د ياد ولايت د رسمي سپورتي لوبډلو ترمنځ پيل شوې.
 د يادو لوبو د پرانیستلو په مراسمو کې مسئولينو د خلکو په روغتیا کې د سپورت د رول په اړه خبرې وکړې.

پکتیا

د پکتيا ولايت پوهنې رئيس مولوي عبدالوکيل خالد د ياد ولايت سيد کرم ولسوالۍ ته د يوه رسمي سفر په ترڅ کې، د ديني مدارسو اداري او ښوونيز فعاليتونه وارزول. 
نوموړي په ښوونځيو او مدارسو کې د ښوونيز حالت پر ښه والي د ټينګار تر څنګ، مسئولينو ته د اسلامي ارشاداتو په اړه د.ا.ا.عالي رهبرۍ فرمانونه بيان او له هغوى يې وغوښتل، چې خپل ټول فعاليتونه د يادو لارښوونو په رڼا کې تنظيم کړي.

هرات

په هرات ولایت کې د یوه خصوصي ښوونځي د زده کوونکو دويم علمي او فرهنګي نندارتون، د یو لړ مراسمو په ترڅ کې د ياد ولایت د پوهنې مسئولینو، د خصوصي ښوونځیو د استازو او د زده کوونکو د والدینو په ګډون پرانيستل شو.
 د ياد ولايت پوهنې رئيس دغه ډول پروګرامونه د زده کوونکو د استعدادونو د ودې او پراختيا په برخه کې ګټور وبلل او د يادې ښوونيزې مؤسسې له مسئولينو يې مننه وکړه.

پنجشېر

 په پنجشېر ولايت کې د ملي تخنيکي او مسلکي ادارې له لوري، د "ترنم او فرهنګ" ادبي خپرونه د پوهنې رياست په همکارۍ د ياد ولايت د کنفرانسونو په تالار کې د شاعرانو، ليکوالانو، مشرانو او ځوانانو په ګډون جوړه شوه.
د پوهنې رئيس مولوي غلام ايشان حماس وويل: په ياد پروګرام کې د ښوونځيو او مدارسو زده کوونکو په څلورو ژبو خپلې مقالې او ترانې ولوستلې.