د کابل ولایت پوهنې ریاست له ادارو څخه د څارنې او ارزونې بهیر پیل شو
د پوهنې وزارت د کیفیت تضمين معنييت د څارنې او ارزونې ریاست اړوند د څارنې پلاوي رئيس مولوي غلام ربي رباني، د کابل ولایت له پوهنې رئیس مولوي عبدالحق حقاني سره وکتل.
په ياده کتنه کې ورغلي پلاوي د خپلو ارزونو موخه، د پوهنې له رئیس سره شریکه او په دې برخه کې یې د لازمو آسانتياوو برابرولو او همکارۍ غوښتنه وکړه.
د پوهنې رئیس د یاد ریاست د پلانونو د تطبیق د هرکلي ترڅنګ ژمنه وکړه، چې د څارنې د پلانونو د تطبیق په موخه به د آسانتیاوو برابرولو په برخه کې له ياد پلاوي سره لازمه همکاري وکړي.
ورپسې د څارنې او ارزونې پلاوي پوهنې ریاست او د کابل ولایت د بګرامي، چهارآسیاب او خاک جبار ولسوالیو د یو شمېر ښوونځیو اداري او تدریسي چارې وڅارلې او د پوهنې ریاست مسئولینو ته یې د ښوونيز وضعيت د لاښه والي په موخه لازمې لارښوونې او مشورې ورکړې.
ټاکل شوې، چې د څارنې ياد بهیر به تر راتلونکو دوو اوونیو پورې دوام وکړي او په ترڅ کې به یې د کابل ولایت د څورلسو ولسوالیو د پوهنې آمريتونو چارې وڅېړل شي.
