د پوهنې وزارت پلاوي هرات ولایت ته رسمي سفر وکړ
د پوهنې وزارت د ولایتي چارو د سمون او پلان ریاستونو یو ګډ پلاوي هرات ولایت ته د خپل رسمي سفر په ترڅ کې، د ياد ولايت له پوهنې مشرتابه، مسئولينو او دیني علماوو سره وکتل.
دغه راز ياد پلاوي د يوې غونډې پر مهال د پوهنې وزارت د درې کلن ملي پلان د طرحې په اړه ګډون والو ته معلومات ورکړل او د دغه پلان د بډاینې په اړه يې د مسئولينو نظرونه واورېدل.
د يادې غونډې په ترڅ کې د پوهنې وزارت د درې کلن ملي پلان د جوړښت په اړه بحثونه او د نظرونه تبادله وشوه، چې د هېواد په کچه د ښوونې او روزنې د وضعیت تحلیل پکې شامل وو.
د هرات پوهنې رئيس مولوي رحمت الله جابر د ياد ملي پلان د چمتووالي او اهميت په اړه خبرې وکړې او هغه يې د پوهنې د ټولو رياستونو لپاره يوه اړينه او مهمه موضوع وګڼله.
په پای کې ګډون والو د پلان د بشپړولو په موخه خپل نظریات وړاندې کړل، چې د پلاوي له لوري ياداشت شول.
