د کابل ولایت په یو شمېر ښوونځیو کې د سیرت النبی «صلي الله علیه وسلم» د سیالیو پایلې اعلان شوې
د اسلام د ستر لارښود حضرت محمد «صلي الله علیه وسلم» د سیرت سیالۍ، چې څه موده وړاندې د کابل ولایت په پغمان ولسوالۍ کې د ښوونځیو د زده کوونکو ترمنځ په لاره اچول شوې وې؛ نن یې پایلې د پوهنې مسئولینو، علماوو او قومي مشرانو په ګډون د یوې غونډې په ترڅ کې اعلان شوې.
یاده غونډه د قرآن عظیم الشان د مبارکو آیتونو په تلاوت سره پیل شوه، ورپسې د پغمان ولسوالۍ د ښوونیزې څارنې آمر د غونډې ګډون والو ته ښه راغلاست ووایه او د یادو سیالیو په اړه یې مفصل معلومات وړاندې کړل.
په ورته مهال د پغمان ولسوالۍ پوهنې آمر انجنير حکمت الله «زاهد» د ټولنې د اصلاح په برخه کې د ديني علومو تدريس ته په اشارې سره وويل: له دغو سياليو څخه يې موخه، د حضرت محمد«صلي الله علیه وسلم» له کردار، کړنو او اخلاقو سره د زده کوونکو آشنا کول وو.
دغه راز نوموړي زیاته کړه، د حضرت محمد «صلي الله علیه وسلم» د سیرت سیالۍ د پغمان ولسوالۍ ښوونځیو د ۱۳۲۲ زده کوونکو ترمنځ ترسره شوې او د مسئولینو له هر اړخیزې ارزونې وروسته د دانش لېسې څخه عبدالوهاب لومړی مقام، د ده عربان لېسې څخه صفی الله او مایل په ترتیب سره دویم او درېیم مقامونه وګټل، چې یادو ګټونکو ته کمپیوټرونه، د قرآن کریم قلمي نسخې، موبايلونه، د مطالعې کتابونه او ستاینلیکونه ورکړل شول.
د پغمان پوهنې آمر څرګنده کړه، چې له څلورم څخه تر ٥٠م مقامونو پورې ګټونکو ته لاسي، ديوالي ساعتونه، د مطالعې کتابونه او ستاينليکونه ووېشل شول.
مراسم د افغانستان د خلکو د هوساینې او د پوهنې د پرمختګ په دعائیې سره پای ته ورسېدل.
