په غزني ولايت کې د یو ښوونځي بیارغونې چارې ترسره شوې

د غزني ولایت په رشیدانو ولسوالۍ کې د "بي بي خدیجه الکبری" ښوونځي بیارغونې چارې پای ته ورسېدې او د پوهنې ریاست د مسئولینو، د رشیدانو ولسوالۍ پوهنې آمر، علماوو او قومي مشرانو په حضور کې  ګټې اخیستنې ته وسپارل شو.
د ښوونځي د پرانیستنې مراسم د قرآن عظیم الشان د څو مبارکو آیتونو په تلاوت سره  پیل شول؛ ورپسې د غزني پوهنې ریاست د تدارکاتو مدیر مېلمنو ته ښه راغلاست ووایه او د پوهنې وزارت له اساسي پلانونو څخه کوم چې دهېواد ټولو ماشومانو لپاره د زده کړو آسانتیاوو برابرول دي، ګډون والو ته معلومات ورکړل. 
يو شمېر علماوو او نورو ويناوالو هم د ټولنې د جوړښت په فردي او ډله ييزه سمون کې د پوهنې پر اهميت خبرې وکړې او د ماشومانو له والدينو يې وغوښتل، تر څو خپل اولادونه د علم د زده کړې په موخه ښوونځيو او مدارسو ته واستوي.