له ولایتونو څخه د پوهنې خبرونو ته یوه لنډه کتنه
هلمند
د هلمند ولايت پوهنې رئيس الحاج مولوي محمد عوض انصاري د یوه رسمي سفر په ترڅ کې، نوزاد ولسوالۍ ته ولاړ او د يادې ولسوالۍ د ښوونځيو د اداري او تدريسي چارو د څارنې تر څنګ يې، له هغو ځمکو څخه چې د دوسنګ، تنګي او شیخ زایي د ښوونځیو لپاره د ځایي خلکو له لوري اخیستل شوي دي، لیدنه وکړه.
بلخ
د بلخ ولايت پوهنې رياست کاري غونډه، د یاد ریاست د ښوونې او روزنې آمریت تر څارنې لاندې، د پوهنې مسئولینو، کارکوونکو او همکارو ادارو په ګډون ترسره شوه.
د بلخ پوهنې رئیس د يادو ادارو د همکاريو د قدردانۍ په ترڅ کې له هغوى وغوښتل، ترڅو خپل فعالیتونه د کړنلارې له مخې، د دغه ولايت له پوهنې رياست سره په همغږۍ ترسره کړي.
لوګر
د لوګر ولایت پوهنې ریاست د ښوونیزې ټکنالوژۍ او ساینس مدیریت، د محمد آغې ولسوالۍ اړوند د وحدت عالي لېسې زده کوونکو ته د کمپيوټري پروګرامونو د زده کړې په موخه، د میزونو او څوکیو په ګډون ۳۱ پایې کمپیوټرونه و وېشل.
ننګرهار
د ننګرهار ولایت پوهنې ریاست او د یونیسف مؤسسې په همکارۍ، له ۳۹ تنو وړ کسانو څخه چې ۲۷ تنه یې ښځې وې، رقابتي آزموینه واخیسته، ترڅو بریالي کسان په سیمه ییزو او ګړندیو ښوونیزو ټولګیو کې د ښوونکو په توګه وګماري.
لغمان
د لغمان ولایت پوهنې رئیس مولوي شاه جهان ساجد د یوه څارنیز پروګرام په ترڅ کې، د قرغیو ولسوالۍ د یوشمیر ښوونځیو له اداري او تدریسي چارو څخه څارنه وکړه، د زده کوونکو ښوونیزه کچه یې و ارزوله او د هغوی په سالمه پالنه یې ټینګار وکړ.
