د پوهنې وزارت د دعوت او ارشاد ریاست مسئولینو د کابل ولایت استالف ولسوالۍ له مرکزي لېسې څخه لیدنه وکړه
د پوهنې وزارت د دعوت او ارشاد رياست د ځانګړي پلان له مخې، د کابل ولايت د مرکز او ولسواليو د ښوونځيو له مسئولينو، ښوونکو او زده کوونکو سره د ليدنو په دوام، نن د یاد ریاست يو پلاوى د استالف ولسوالۍ مرکزي لېسې ته ولاړ او د همدې لېسې له ښوونکو او زده کوونکو سره یې وکتل.
د کتنې پرمهال، یاد پلاوي د ټولنې په اصلاح کې د دیني لارښوونو پر رول هراړخیزې خبرې وکړې او زده کوونکو ته یې لارښوونه وکړه، چې په خپلو ورځنیو چارو کې د اسلام د ستر پیغمبر حضرت محمد «صلی الله علیه وسلم» سنت او تګلاره عملي کړي.
د يادې لېسې مسئولينو د پوهنې وزارت د دعوت او ارشاد ریاست د لارښوونو هرکلى وکړ او ژمنه يې وکړه، چې د یاد وزارت د مشرتابه او د دغه رياست له لارښوونو سره سم به خپلې ورسپارل شوې چارې پرمخ وړي او د دیني درسونو په حلقو کې به په جدي ډول برخه واخلي.
