د کابل ولایت او د ښار پوهنې ریاستونو د بودیجې کمېټې غونډه ترسره شوه
د پوهنې وزارت او اړوند ریاستونو د مالي او تدارکاتي چارو د لا ښه والي په موخه، د کابل ولایت او د ښار پوهنې ریاستونو د بودیجې کمېټې غونډه د یاد وزارت د سرچینو او ادارې معینیت په تالار کې جوړه شوه.
یاده غونډه د پوهنې وزارت د سرچینو او ادارې د معین مولوي صبغت الله وصیل په مشرۍ د کابل ولایت او د ښار پوهنې، مالي او حسابدارۍ، تدارکاتو رئیسانو او یو شمېر نورو کارپوهانو په ګډون جوړه شوه.
د پوهنې وزارت د سرچینو او ادارې معین د یاد وزارت د بودیجې څانګې د مسئولینو د هڅو د قدردانۍ په ترڅ کې، د دغه وزارت د ۱۴۰۲ کال د مالي او بودیجوي کړنو په نیمګړتیاوو، ستونزو او مثبتو ټکو خبرې وکړې او په پایله کې یې د ۱۴۰۳ مالي کال د پروګرامونو او تدارکاتي پلانونو په اړه لارښوونې او مشورې ورکړې.
نوموړي د کابل ولایت او د ښار له پوهنې مسئولینو وغوښتل، چې خپل تدارکاتي پلانونه له یو بل سره په همغږۍ او همکارۍ ترتیب او تنظیم کړي، ترڅو د روان ښوونیز کال د عمومي بودیجې له تصویب سره د فعالیتونو کاري بهیر له ځنډ سره مخ نه شي.
د غونډې ګډون والو هم په یاده برخه کې د سرچینو او ادارې معینیت له همکارۍ او همغږۍ مننه وکړه، دوی د تېر کال د خپلو مالي کړنو راپورونه د غونډې رهبرۍ ته وړاندې کړل او د نوي ښوونیز کال پلانونه یې د غونډې له ګډون والو سره شریک کړل.
غونډه د دعائیې په لوستلو سره پای ته ورسېده.
