په پکتیا ولایت کې د ۸ بابه ښوونځیو لپاره ودانۍ جوړېږي
پوهنې په برخه کې د یو همکار بنسټ مسئولینو، د پکتیا ولایت له پوهنې ریاست مشرتابه سره د یوې غونډې په ترڅ کې ژمنه وکړه، چې په یاد ولایت کې به د ۸ بابه ښوونځیو لپاره نوې ودانۍ جوړې کړي.
د یاد ولايت پوهنې رياست اداري مرستيال وايي، چې دغه مرسته کوونکي بنسټ د يادو ښوونځيو د جوړېدو ټول مالي لګښت پر غاړه اخيستى دى.
نوموړي څرګنده کړه، په دې تړاو د ياد ولايت پوهنې رياست يوې کمېټې ته دنده سپارلې، تر څو د هغو ښوونځيو په اړه سروې ترسره کړي، چې ودانۍ او مناسب درسي چاپېریال نه لري.
په پام کې ده، چې سروې له بشپړیدلو وروسته ژر تر ژره د یادو ښوونځیو د جوړولو عملي چارې پیل شي.
