د پوهنې وزارت د اساسي او ثانوي زده کړو رئیس پروان ولایت کې له معیاري آزموینو څخه څارنه وکړه
د پوهنې وزارت د اساسي او ثانوي زده کړو رئیس مفتي محمد یوسف ثاقب، په داسې حال کې چې د پروان ولایت پوهنې رئیس محترم مولوي سید محمد فیضي یې ملتیا کوله، د بګرام باستان په لېسه کې د معیاري آزموینو د اخیستلو له بهیر څخه څارنه وکړه.
د اساسي او ثانوي زده کړو رئيس وويل، د آزموينې د کنټرول او څارنې موخه د روڼتيا او عدالت تامين او د ښوونځيو د زده کوونکو د آزموينو کيفيت لوړول دي.
نوموړي څرګنده کړه، دغه آزموينه د هېواد په پینځو ولايتونو کې د کلنيو آزموينو په څېر څلورو مضمونونو کې په آزمايښتي ډول په لاره اچول شوې، چې موخه يې د زده کوونکو د آزموينو معياري کول او د زده کړو د کيفيت لوړول دي.
د یادونې وړ ده، چې همدغه آزموينه به د چاريکار ښار صادقي لېسې، جبل السراج ولسوالۍ په جبل السراج لېسې او د بګرام ولسوالۍ په بګرام باستان لېسه کې ترسره شي.
