له مرکز او ولایتونو د پوهنې څو لنډ خبرونه

- کابل ښار
د کابل ښار ښوونځیو لپاره د کرایي کورونو قرارداد غځولو پروسه، د کابل ښار پوهنې رئیس قاري عبدالباسط «حقاني» په حضور کې پیل شوه.

- بامیان:
د بامیان ولایت کهمرد ولسوالۍ اړوند د بنق سیمې خلکو د احمدیه مدرسې لپاره یو جرېب ځمکه، چې اټکل شوی لګښت یې له ۵۰۰ زره افغانیو څخه زیات دی، وقف کړه.

- بدخشان:
د بدخشان ولایت شهدا ولسوالۍ د ښوونځیو آمرینو او سرښوونکو لپاره د "اعېزمنې زده کړې او پوهې ترویج" تر سرلیک لاندې ۶ورځنی روزنیز ورکشاپ ترسره شو.

- پروان:
د پروان ولایت په ښوونځیو کې د صنفي اصولو دورې ۱۷۲ تنو ښوونکو لپاره د مسلکي وړتیاوو لوړولو په موخه، روزنیز ورکشاپ پرانیستل شو او ټاکل شوې ده، چې د شپږو ورځو لپاره دوام وکړي.

- غزني:
د پوهنې وزارت دعوت او ارشاد ریاست پلاوي غزني ولایت ته د خپل رسمي سفر په ترڅ کې، د پوهنې له مسئولینو، د ښوونځیو له آمرینو او مدیرانو سره وکتل او هغوی ته یې د خپلو دیني او مسلکي مسؤلیتونو په تړاو هراړخیز معلومات وړاندې کړل.