د پوهنې وزارت د دعوت او ارشاد ریاست د کړنو او لاسته راوړنو اوونیز راپور
تېره اوونۍ د پوهنې وزارت د دعوت او ارشاد ریاست، د تنویر فکري او کلتوري ادارې سره په همغږۍ، د صدیقي ښوونیز مرکز زدهکوونکو ته علمي، دعوتي او اصلاحي سیمینار ترسره کړ.
دغه سیمینار د ۱۴۰۵ ل کال د وري/ حمل میاشتې په ۱۵مه نېټه د اطلاعاتو او کلتور وزارت د مشاور محترم مولوي عبدالحق حماد له لوري وړاندې شو، چې د ګډونوالو له تود هرکلي سره مخامخ شو.
همدارنګه، د محرابالدین عالي امارتي لېسې د ښوونکو ستونزې واورېدل شوې او د حل په موخه یې اړینې سپارښتنې وشوې.
د راپور پر بنسټ، د دعوت او ارشاد ریاست څارنیز ټیم د نوي ښوونیز کال له پیل سره سم د کابل ښار له نوید روښان، اقراء، القلم، عطار او کارا ښوونیزو مرکزونو څخه هراړخیزه څارنه وکړه او په یاده هره تعلیمي اداره کې یې یو تن مبلغ هم وټاکه.
د یادې څارنې پر مهال د درسي نصاب ارزونه وشوه، د ناسمو انځورونو او نامناسبو جملو د لېرې کولو ترڅنګ، زدهکوونکو ته اصلاحي او ارشادي ویناوې هم وړاندې شوې.
په همدې حال کې د دعوت او ارشاد ریاست مسئولینو د پوهنې وزارت کارکوونکو ته د الله تعالی د عبادت، اطاعت او د «نبوي صلی الله علیه وسلم» اخلاقو په اړه مهمې سپارښتنې وکړې او د هغوی دیني او شرعي پوښتنو ته یې د حنفي فقې په رڼا کې ځوابونه وړاندې کړل.
دغه راز، د پوهنې وزارت له ولایتي ریاستونو ترلاسه شوي معلومات ښيي، د دعوت او ارشاد مسؤلینو په ټولو ولایتونو کې د نصاب د تدریس ترڅنګ اصلاحي بیانونه او اصلاحاتي پروګرامونه په منظمه توګه تطبیق کړي، چې پایلې یې مثبتې ارزول شوې دي، چې د دعوت په سپېڅلې لاره کې دغه هڅې د کارکوونکو د دیني پوهې پیاوړتیا، د نصاب د ښه تطبیق او اصلاحاتي پروګرامونو د اغېزمنتیا څرګندې نښې بلل کېږي.
