په زابل ولایت کې یو باب ښوونځي لپاره احاطوي دېوال جوړولو کارونه پیل شول
د زابل ولایت سیوري ولسوالۍ اړوند د بدین کلي د ښوونځي احاطوي دېوال بنسټ ډبره، پوهنې مسوولینو او د سیمې د قومي مشرانو په حضور کې کېښودل شوه.
د سیوري ولسوالۍ پوهنې آمر د دې پروژې د پیل په مراسمو کې وویل چې د احاطوي دېوال او اړوندو چارو ټول لګښت شاوخوا ۶۰۰ زره افغانۍ اټکل شوی، چې مالي تمویل یې د یوه همکار بنسټ له لوري ترسره کېږي.
نوموړي زیاته کړه: د سیمې اوسېدونکو هم د همدغه ښوونځي لپاره دوه جریبه ځمکه وقف کړې ده، چې دا کار د معارف د پراختیا په برخه کې د خلکو د ونډې څرګندونه کوي.
