د بلخ له پوهنې ریاست څخه خبرونه
د بلخ د پوهنې رياست د سواد زده کړې د پروګرامونو آمریت وايي: په دې وروستيو کې د دغه رياست کارکوونکو په مزارشريف ښار او د دهدادي، بلخ، شورتپې، چمتال، دولت آباد، مارمل او د بلخ په ولسواليو کې د سواد زده کړې د ټولګيو فعاليتونه څارلي دي. او د چارو د ښه والي په موخه د یادو ټولګیو مسوولینو او ښوونکو ته رغنده مشورې ورکړل شوي دي
.
د مزارشريف ښار د پوهنې آمر مولوي محمد نعيم بلخي د اداري چارو د ترسره کولو او د مراجعينو د کارونو د چټکتيا ترڅنګ، د دغه ښار د ښوونيزو مرکزونو له استازو، د يو شمېر ښوونځيو له مديرانو او استادانو سره وکتل. د يادو ښوونځيو د شوراګانو او مسوولينو ستونزې یې واوريدې او د حل په برخه کې يې د مرستو ژمنه وکړه.
د پوهنې ریاست د ښوونځیو د لابراتوارونو د کتنې په دوام، دا ځل د دې ریاست د مرکز ساینس او د تعلیمي ټکنالوژۍ عمومي مدیر د همدې څانګې له لابراتوارونو او اړوندو چارو څارنه وکړه.
د چمتال ولسوالۍ پوهنې آمر مولوي وحیدالله حماسي د دې ولسوالۍ په اوونیزه اداري غونډه کې د دې ولسوالۍ له ولسوال څخه وغوښتل چې په ځینو مواردو کې له پوهنې آمریت سره مرسته وکړي او د ښوونیزو پروګرامونو ملاتړ وکړي.
نوموړي له دې غونډې څخه وروسته د هغه شپږ ورځني معلوماتي سیمینار په پرانیست غونډه کې چې د سیمه ییزو ښوونکو د روزنې د کیفیت د لوړولو په موخه جوړ شوی و، ګډون وکړ او د پوهې د ترلاسه کولو په باب یې خبرې وکړې.
د بلخ ولايت د مارمل ولسوالۍ د پوهنې او د تعلیمي څارنې آمرینو د دې ولسوالۍ په اداري غونډه کې ګډون وکړ، د پوهنې د بهير او د پوهنې د پرمختګ په اړه يې ورسره خبرې وکړې او له هغوى د پوهنې په برخه کې د مرستو غوښتنه يې وکړه.
