د فاریاب ولایت په قیصار ولسوالۍ کې "د غوره منځني ښوونځي" ودانۍ ورغول شوه
د فاریاب ولایت قیصار ولسوالۍ اړوند "د غوره منځني ښوونځي" نوې ودانۍ، چې د یوې همکارې ادارې په مالي مرسته د ۴.۸۹ مېلیونه افغانیو په لګښت جوړه شوې وه، په رسمي ډول د یاد ولایت پوهنې چارواکو لخوا افتتاح او ګټې اخیستنې ته وسپارل شوه.
د ښوونځي دغه ودانۍ ۶ درسي ټولګي، یوه اداري خونه، د لمریزې برېښنا او څښاک پاکو اوبو سیسټمونه، احاطوي دېوال او ځینې نور اړین ملحقات لري.
د یاد ولایت پوهنې رئیس محترم الحاج مولوي حمیدالله ارشاد د ښوونځي د پرانیستې په مراسمو کې وویل: "طبیعي ده چې د مناسب ښوونیز چاپېریال په رامنځته کولو سره د زدهکړې کیفیت لوړېږي."
نوموړي له خلکو وغوښتل چې د پوهنې ریاست له پلانونو او پروګرامونو مالي او معنوي ملاتړ وکړي او د ښوونځي ادارې سره یوځای د خپلو ماشومانو د ښوونې او روزنیز بهیر کې فعاله برخه واخلي.
