د نورستان او کونړ ولایتونو د ښوونځیو لپاره د درسي کتابونو د وېش لړۍ پیل شوه
د هېواد د ښوونځيو د زده کوونکو لپاره د درسي کتابونو د وېش په پیل سره، اوسمهال د نورستان ولايت د ښوونځيو پر زده کوونکو د درسي کتابونو د وېش لړۍ، د يو لړ مراسمو په ترڅ کې، د یاد ولايت د پوهنې رئيس مولوي تاج محمد مطمئن، د ولايت مقام مرستيال فيصل مختار، د اطلاعاتو او فرهنګ رئيس، يو شمېر مسئولينو او علماوو په حضور کې پيل شوه.
د نورستان ولايت پوهنې رئیس په تدريسي بهير کې د درسي کتابونو د اهميت په څرګندولو سره وويل: د یاد ولايت پوهنې رياست لپاره د درسي کتابونو ټول سهم ٢٤٧زره٢٠٠ ټوکه وو، چې په لومړي پړاو کې ٩٧ زره ٩٤١ ټوکه کتابونه زده کوونکو ته وېشل شوي او اوسمهال د پاتې ١٤٨ زره ٣٧٢ ټوکو په رارسېدو سره د دويم پړاو کتابونو د وېش لړۍ پيل شوې ده.
د یادونې وړ ده، تېره ورځ هم د کونړ ولایت پوهنې رئیس او د سيمه ييزو ادارو د مسئولینو په ګډون ورته مراسم جوړ شوي وو، چې په ترڅ کې يې د دغه ولايت د ښوونځيو لپاره د درسي کتابونو د وېش لړۍ رسماً پيل شوه.
د کونړ ولایت پوهنې ریاست د مسئولینو په وینا، د یاد ولایت لپاره د درسي کتابونو ټول سهم ۸۲۵ زره ۳۷۷ ټوکه وو، چې په لومړي پړاو کې یې ۲۰۷ زره ۵۹۰ ټوکه وېشل شوی وو او اوس یې د پاتې ۵۹۵ زره ۴۹۸ ټوکو کتابونو د وېش بهیر په تازه ډول پیل شوی دی.
