د هېواد د ولسوالیو او ښوونیزو ناحیو د پوهنې آمرینو علمي او مسلکي سیمینار پایغونډه ترسره شوه
د رهبري او مدیریتي وړتیاوو لوړولو په موخه څلور ورځنی علمي او مسلکي سیمینار، چې د پوهنې وزارت لخوا د هېواد د ولسوالیو او ښوونیزو ناحیو د ۴۷۳ تنو آمرینو لپاره پیل شوی و، د پوهنې وزارت د سرپرست الحاج مولوي حبیب الله آغا، د آزموینو ملي ادارې لوی رئیس شیخ عبدالباقي حقاني، د سرچینو او ادارې معين الحاج مولوي صبغت الله وصیل، د تشکیلاتو رئیس مفتي عبدالحليم حليمي، يو شمېر مسئولينو او جیدو علماءکرامو په حضور کې رسماً پای ته ورسېد.
لومړی د پوهنې وزارت د تشکیلاتو رئیس د غونډې مېلمنو او حاضرینو ته ښه راغلاست ووایه او له اړوندو آمرینو څخه یې وغوښتل چې د ښوونکو او اداري کارکوونکو لپاره د نویو بستونو وېش لپاره د توازن په رامنځته کولو کې له یاد وزارت سره همکاري وکړي.
ورپسې د پوهنې وزارت سرپرست په خپله اصلاحي وینا کې کار اهل کار ته پر سپارلو د ټینګار ترڅنګ، له ګډون والو وغوښتل چې د هېواد بچیانو د ښوونیز او روزنیز کیفیت لوړولو کې هر اړخیزې هڅې وکړي.
په ورته مهال، د آزموینو ملي ادارې لوی رئیس د سیمینار ګډون وال، د دیني علومو ترڅنګ د عصري علومو د معیاري کولو په برخو کې د ځوانانو روزلو ته وهڅول.
په پای کې د پوهنې وزارت سرپرست لخوا ګډون والو ته د تصدیق پاڼو او نغدي ډالیو له ورکولو وروسته، غونډه د پوهنې وزارت د سرچینو او اداري معین په دعائیې سره پای ته ورسېده.
