د وري میاشتي دریمه نیټه د ښوونځي د زنګ په نوم ونومول شوه
د هیواد د ښوونې او روزنې نظام د کیفیت او کمیت حالت د ډير ښه والي، پراختیا او ودې په موخه، د افغانستان د ښوونې او روزنې سیسټم په وده کې د هیوادوالو، بنسټونو او ادارو د پاملرنې او ډيرو همکاریو جلبولو لپاره، وړاندې له دې د پوهنې وزارت له لوري ۱۳۹۷ لمریز کال د پوهنې کال په نامه ونومول شو چې وروسته د یاد وزارت د وړاندیز او د افغانستان د اسلامي جمهوري ریاست عالي مقام په هڅو او پاملرنې د پوهنې لسیزې باندې بدل شو.
په همدې لړ کې د روان کال د سلواغې میاشتې ۲۱مې نیټې د افغانستان اسلامي جمهوريت د کابینې په غونډه کې، پریکړه وشوه چې د وري دریمه دې "د ښوونځي زنګ" په نامه ونومول شي او د هیواد په رسمي کلیزه کې د ثبت شي.
پوهنې وزارت او د افغانستان علم پروره ټول ولس د افغانستان جمهوري حکومت او دولت د ملاتړ ته د قدر په سترګه ګوري او هرکلۍ یې کوي او باور لري چې انشاءالله د الله ج په مرسته او د دولت او خلکو په ملاتړ کولای شي د ښوونې او روزنې یوه معیاري نظام په لاره کې د یاد وزارت د مطروحه عملي پلانونو په پلي کولو سره چې د اوسني وخت نوي نسلونو ټولو اړتیاوو ته ځواب ویونکۍ وي، بریالۍ شي.
