د ولایتونو د پوهنې له ریاستونو څخه څو لنډ خبرونه
هلمند
د هلمند ولایت د پوهنې رئیس الحاج مولوي محمد اسماعیل سعادت د دغه ولایت د رسمي او خصوصي ديني مدارسو له مسؤلینو سره وکتل او د يادو مدارسو د اداري او درسي فعالیتونو د ښه والي په اړه یې ورسره خبرې وکړې.
په دې غونډه کې د پوهنې وزارت له لوري پر مالي مرستو، د طرزالعملونو د تطبیق او د پوهنې وزارت اړوند درسي نصاب پر طرحې هم خبرې وشوې.
له بلې خوا يادو مسوولينو د خپلو ديني مدرسو ستونزې او وړانديزونه وړاندې کړل او په دې برخه کې يې د همکارۍ غوښتنه وکړه، چې د پوهنې رياست د مشرتابه پلاوي له خوا ومنل شول.
نیمروز
د نیمروز ولایت د پوهنې ریاست اداري غونډه د دغه ولایت د پوهنې رئیس الحاج مولوي ګل احمد حقاني تر نظارت لاندې جوړه شوه. په دې کتنه کې د نيمروز د پوهنې رئيس له ټولو مسوولينو او کارکوونکو وغوښتل چې د پوهنې وزارت د قوانينو او لوايحو په رڼا کې خپلې دندې ترسره کړي.
لغمان
د لغمان ولايت د پوهنې رئيس مولوي شاه جهان ساجد د ياد رياست د مرکزي ادارې د کارکوونکو کړنې او دندې له نيږدې وڅارلې او د يادې ادارې د کارکوونکو د هلو ځلو د ستاينې په ترڅ کې يې له هغوی څخه وغوښتل چې د اصولو سره سم اجراات وکړي او خپلو دندو ته پابند و اوسي.
د دې ولایت د يو بل خبر له مخې ؛
د عليشنګ ولسوالۍ د پوهنې آمر د دغه آمريت له کارکوونکو سره د لیدنې پر مهال ، څلور نیم میاشتنيو ازموینو د اخیستلو، د پوهنې د ادارو په اداري او تدریسي چارو کې د اساسي کړنلارو تطبیق او د ځینو نورو اړینو مسایلو په اړه خبرې وکړې .
بغلان
د بغلان ولایت د پوهنې رئیس الحاج مولوي محمد نور عزیزي د دغه ولایت د علماوو شورا له رئیس شیخ کمال الدین حقاني سره وکتل.
په دې کتنه کې دواړو لورو په دغه ولايت کې د ماشومانو د ښوونې او روزنې په برخه کې د يادو رياستونو د همکارۍ او همغږۍ په باب خبرې وکړې او په خپلو همکاريو يې ټينګار وکړ.
