د ولایتونو له پوهنې ډګره څو لنډ خبرونه
نورستان
د نورستان ولایت پوهنې ریاست د یو مرستندویه بنسټ په همکارۍ، د ښوونکو د مسلکي پراختيا په موخه د ۲۸ بابه ښوونځیو ښوونکو او علمي غړو ته (د ښوونکو لپاره د اغیزمنې ښوونې او روزنې د پراختيا پروګرام) تر سرلیک لاندې ۱۲ ورځنی میتودیک ورکشاپ په لاره واچاوه.
پکتیا
د پکتيا ولايت پوهنې رئيس مولوي عبدالوکيل خالد د ياد ولايت په مرکز ګردېز ښار کې، د يو شمېر کليو له مشرانو او ديني علماوو سره وکتل.
په ياده ناسته کې قومي مشرانو د درسي پروګرامونو په اړه خپل وړاندیزونه مطرح کړل او په ياده برخه کې یې د همکارۍ غوښتنه وکړه.
هلمند
د هلمند ولایت پوهنې رئیس الحاج مولوي محمد عوض انصاري، د ياد ولایت مرکز اړوند د ۳ بابه ښوونځيو اداري او تدریسي چارې له نيږدې وڅارلې او د پوهنيزو چارو لاښه والي په موخه یې اړوندو مسئولینو ته لازمې لارښوونې وکړې.
ارزګان
د ارزګان ولايت پوهنې ریاست مشرتابه له یو شمېر دیني علماوو او د سیمه ییزو ادارو له مسئولینو سره په کتنه کې، د دیني مدارسو د جوړېدو په تړاو خبرې وکړې.
دواړو لورو له بېلابېلو سيمو څخه ليدنې وکړې او د مدارسو د جوړولو لپاره یې ځانګړې نقطې په ګوته کړې.
بغلان
د بغلان ولايت پوهنې رئيس الحاج مولوي محمد نورعزيزي دبايسقال کلي د يو باب ښوونځي د بياجوړولو له چارو څخه څارنه وکړه او قراردادي شرکت ته يې د ساختماني توکو د کيفيت په برخه کې لازمې لارښوونې وکړې.
