د پروان او لغمان له پوهنې ریاستونو څخه خبرونه
پروان
د پوهنې وزارت د نتایجو او شهادتنامو رئیس مولوي صبغت الله وصیل د یوه کاري سفر په ترڅ کې د پروان ولایت د پوهنې ریاست د نتایجو او شهادتنامو د وېش له څانګو څخه لیدنه وکړه او په دغه ولایت کې یې د شهادتنامو د وېش بهیر د الکترونیکي کېدو اعلان وکړ.
د یاد ولایت د پوهنې رئیس مفتي محمد حسن حقاني د دې بهیر د برښنایي کېدو هرکلی وکړ.
د پروان ولایت د جهادي مدرسې درسونه د یو لړ ځانګړو مراسمو په ترڅ کې د پوهنې ریاست د مشرتابه پلاوي، دیني عالمانو او قومي مخورو په حضور کې پیل شول.
په دې مراسمو کې د پوهنې رئيس او يو شمېر ويناوالو د يادې مدرسې د مبارکۍ په ترڅ کې له زده کوونکو وغوښتل، چې خپلې زده کړې په جدي توګه تعقيب کړي.
لغمان
د لغمان ولایت د ښوونې او روزنې آمر د یونیسف، ACDO او ابرار موسسو له مسوولینو سره وکتل او د پوهنې وزارت د قوانینو او طرزالعملونو له مخې یې د سیمه ییزو او ګړندیو ښوونیزو ټولګیو د فعالیتونو په اړه ورسره خبرې وکړې.
همدا راز ابرار موسسې په دغه ولایت کې د سیمه ییزو زده کړو ۳۲۰ ټولګیو ته سولري بیټرۍ، ۲۶۷ پنکې، برېښنایي مزي او نور اړین تخنیکي توکي ووېشل.
په لغمان ولایت کې د یوه خصوصي ښوونځي ادارې د دغه ولایت د پوهنې ریاست په مرسته د لغمان ولایت په کچه د کال غوره زده کوونکي د ټاکلو په موخه له ۱۲۰۰ تنو زده کوونکو څخه چې ۲۵۰ تنه یې نجونې وې، د سیالۍ ازموینه واخیستله.
د النیګار ولسوالۍ د تعلیمي څارنې آمریت وایي: د دغه آمریت کارکوونکو د دې ولسوالۍ په اړوندو ښوونځیو کې د اصول صنفي ټولګیو د زده کوونکو د کلنۍ ازموینې څخه څارنه وکړه.
