د پوهنې وزارت او د زندانونو چارو د سمون ادارې ترمنځ د دوهاړخیزو همکاریو هوکړهلیک لاسلیک شو
د افغانستان اسلامي ا.مارت د پوهنې وزارت او د زندانونو چارو د سمون ادارې ترمنځ، د تعلیمي بهیر پیاوړتیا او د زندانیانو د ښوونې او روزنې پراختیا په موخه د دوهاړخیزو همکاریو هوکړهلیک لاسلیک شو.
یادهوکړهلیک د ځانګړو مراسمو په ترڅ کې د پوهنې وزارت د کیفیت تضمین محترم معین الحاج مولوي عبدالخالق صادق، د زندانونو چارو د سمون ادارې مسئولینو او د دواړو ادارو د یو شمېر غړو په حضور کې لاسلیک شو.
په پیل کې، د زندانونو چارو د سمون ادارې مسئولینو د پوهنې وزارت پلاوي ته د هرکلي ترڅنګ څرګنده کړه، چې د دې هوکړهلیک اساسي موخه د زندانونو دننه د بندیانو د زدهکړې، روزنې او فکري ودې لپاره زمینه برابرول دي.
ورپسې د پوهنې وزارت د کیفیت تضمین محترم معین د علم، پوهې او سالمې روزنې پر ارزښت هراړخیزې خبرې وکړې او ویې ویل:«اسلامي امارت هوډ لري، چې زندانونه د سختۍ له ځایه د ښوونې او روزنې په مرکزونو بدل کړي.
نوموړي زیاته کړه، یاد وزارت ژمن دی چې حتی د بندیانو لپاره هم د زدهکړې لازم فرصتونه برابر کړي.»
د یاد هوکړهلیک له مخې، دواړه ادارې به په ګډه د زندانیانو لپاره د تعلیمي پروګرامونو، روزنیزو سمینارونو او فکري پرمختګونو طرحې عملي کوي، څو د هغوی د ذهني، معنوي او ټولنیزې پیاوړتیا زمینه رامنځته شي.
