د پوهنې وزارت دارالعلومونو رئیس لوګر ولایت ته رسمي سفر وکړ
د پوهنې وزارت د اسلامي زده کړو معینیت دارالعلومونو رئیس الحاج مولوي عبدالقدوس قدوسي په مشرۍ یو پلاوی لوګر ولایت ته ورسېد.
نوموړي د یاد ولایت له پوهنې رئیس او مسئولینو سره په کتنه کې، د خپل سفر اساسی موخې تشرېح او هغوی ته یې د پوهنې وزارت د هغو پروګرامونو یادونه وکړه، کوم چې د ښوونیزو او روزنیزو مرکزونو د کیفیت لا پراختیا او پیاوړتیا په برخو کې یې تنظیم کړي دي.
ټاکل شوې ده چې نوموړی به د خپل سفر پرمهال د یاد ولایت له دارالعلومونو او درسي پروسو څخه څارنه ترسره او هم به د پورته ذکر شویو ادارو وړاندیزونه، نظرونه او ستونزې له نږدې څخه وارزوي.
د لوګر ولایت پوهنې رئیس له یاد پلاوي څخه د هرکلي سربېره، د هغوی د پلانونو پلي کولو لپاره د هر ډول ممکنه همغږۍ او همکارۍ ژمنه وکړه.
