د پوهنې وزارت دخواشینۍ او ډاډګیرنې پیغام
په غزني کې د 12 تنو زده کوونکو د شهادت او ټپی کېدو له امله د پوهنې سرپرست وزیر ښاغلي ډاکټر محمد میرویس بلخي د خواشینۍ پیغام!
په ډېرې خواشینۍ سره مو خبر ترلاسه کړ چې د غزني ولایت د اندړو ولسوالۍ د ملانو بابا په ښوونځي د یوې هاوان مرمۍ د لګېدو له امله څلور تنه زده کوونکي شهیدان او اته تنه نور ټپیان شوي دي.
د پوهنې وزارت لپاره د زده کوونکو او د پوهنې لارویانو د شهادت او ټپیکېدو خبر دردونکی او زړه بوږنونکی دی.
د پوهنې وزارت رهبري د شهیدانو له کورنیو سره په دې غم کې ځان شریک بولي او ډاډ ورکوي چې د یادې پېښې د ټپیانو په درملنه کې به له خپلو ټولو امکاناتو څخه کار واخلي.
د پوهنې وزارت رهبري یو ځل بیا د جګړې په ټولو ښکېلو خواوو او ډلو غږ کوي چې د ښوونځیو پر ښوونکو, زده کوونکو, کارکونکو او د پوهنې پر تاسیساتو له حملو څخه ډډه وکړي, ځکه چې دا قشر له سیاست څخه لرې او تل د هیواد د پرمختګ او سوکالۍ لپاره په پوره اخلاص, صداقت او ایماندارۍ خدمت او زده کړې کوي.
