د پوهنې وزارت د دعوت او ارشاد ریاست پلاوی اروزګان ولایت ته په رسمي سفر ولاړ
د پوهنې وزارت د دعوت ارشاد ریاست پلاوی سویلي ولایتونو ته د خپل رسمي سفر په ترڅ کې، اروزګان ولایت ته ولاړ او هلته یې د یاد ولایت پوهنې رئیس الحاج مولوي شمس الله آخندزاده"کامران" او د یو شمېر کلیدي څانګو له مسئولینو سره وکتل.
د پوهنې وزارت د دعوت او ارشاد ریاست پلاوي د اروزګان ولایت پوهنې رياست مسئولینو سره په کتنه کې، د دعوت او ارشاد د نصاب پر تدریس د ټینګار ترڅنګ، د کارکوونکو او منسوبینو د صورت او سیرت په تړاو تفصیلي خبرې وکړې.
همدارنګه په پلان کې ده چې د پوهنې وزارت د دعوت او ارشاد ریاست پلاوی به د یاد ولایت د ولسوالیو پوهنې آمریتونو له کارکوونکو سره د کتنې سربېره، د خصوصي تعلیمي مرکزونو او ښوونځیو څخه څارنه ترسره او ورته علمي ویناوې وکړي.
