د پوهنې وزارت د مدارسو او دارالحفاظونو رئیس د پروان ولایت له پوهنې مسئولینو سره وکتل.
د پوهنې وزارت د اسلامي زده کړو معینیت د دارالحفاظونواو مدارسو رئيس مولوي عبدالرزاق صديق، د پروان ولايت د ديني بنسټونو د وضعيت څېړلو په موخه، یاد ولایت ته سفر وکړ.
د مدارسو او دارالحفاظونو رئیس، د یاد ولایت له پوهنې رئیس، مسئولینو او یو شمېر علماوو سره د یوې ناستې په ترڅ کې، د مدارسو او دیني زده کړو د بنسټونو لپاره د پروګرامونو او پالیسیو په اړه توضیحات ورکړل او دهېواد د بچیانو لپاره یې د زده کړو په برخه کې د لا زیاتوآسانتیاوو په برابرولو ټینګار وکړ.
نوموړي د مدارسو لپاره د خالي بستونو د ډکولو او ګمارنې د څرنګوالي په تړاو، د پوهنې ریاست له مشرتابه وغوښتل، چې ياده پروسه په رڼه او چټکه توګه پلې کړي.
په پای کې د پروان ولايت د پوهنې رئیس مفتي محمد حسن حقاني، یاد ولايت ته د ورغلي پلاوي هرکلى وکړ، نوموړي دیاد پلاوي د پروګرامونو او وړاندېزونو د تطبيق په برخه کې، د همکارۍ ژمنه وکړه.
