د پوهنې وزارت د څارنې او ارزونې رئیس بدخشان ولایت ته رسمي سفر وکړ
د پوهنې وزارت د څارنې او ارزونې رئیس مولوي غلام ربي «رباني» بدخشان ولایت ته په رسمي سفر ولاړ او په پلان کې ده چې نوموړی د یاد ولایت د پوهنې ریاست اړوند بېلابېلو څانګو له کړنو او دندو څخه څارنه او ارزونه وکړي.
دغه پلاوي د بدخشان د پوهنې ریاست له رهبرۍ سره د کتنې پرمهال، د پوهنې په برخه کې کار کول عبادت وبلل او ټینګار یې وکړ چې د یاد ولایت خلک د ډېرو سختیو او ستونزو له امله د لا ښو او ګټورو خدمتونو مستحق دي.
په دې کتنه کې د بدخشان ولایت پوهنې ریاست سرپرست او د سرچینو او ادارې آمر قاري عبدالهادي «هادي» د څارنې او ارزونې رئیس او ورسره مل پلاوي ته د ښه راغلاست ترڅنګ ټینګار وکړ، چې دغه اداره د پوهنې د کیفیت لاښه والي په برخه کې خپلې ټولې هڅې کوي.
همدارنګه نوموړي ښوونیزو موخو ته د رسېدلو په برخه کې د خلکو او ښوونکو پر ملاتړ ټینګار وکړ او له پوهنې وزارت څخه یې وغوښتل چې د مسلکي ښوونکو د کمښت، د ښوونیزو مرکزونو د نشتوالي په ګډون شته ستونزو ته لازیاته پاملرنه وکړي.
په پای کې د پوهنې وزارت پلاوي ډاډ ورکړ چې د دې ارزونې پایلې به د وزارت مشرتابه ته وړاندې او په جدي تعقیب سره به د شته ننګونو د حل لپاره هڅې وکړي.
