د پوهنې وزارت د ښوونې او روزنې محترم معین اروزګان ولایت ته سفر وکړ
د پوهنې وزارت د ښوونې او روزنې د معین محترم شیخ عبدالمالک حقاني په مشرۍ پلاوي سوېلي ولایتونو ته د رسمي سفر په ترڅ کې اروزګان ولایت ته ورسېد او هلته یې د پوهنې له مسوولینو او د ښوونکو د مسلکي پراختیا له اړوندو غړو سره د تعلیمي وضعیت ارزونې او د ۱۴۰۵ لمریز کال د منظور شوي عملیاتي پلان د تطبیق د څرنګوالي په اړه کاري غونډه وکړه.
په دې غونډه کې د پوهنې د فعالیتونو، تعلیمي بهیر او د منظور شوي عملیاتي پلان د تطبیق د څرنګوالي ارزونې په موخه پر اړینو موضوعاتو خبرې وشوې او د چارو لا ښه والي، د فعالیتونو د اغېزمن تطبیق او د ښوونیزو موخو د تحقق په اړه مسوولینو ته لازمې سپارښتنې وشوې.
د پوهنې وزارت د ښوونې او روزنې محترم معین د علم او پوهې پر ارزښت او د ښوونې او روزنې په برخه کې د مسوولینو پر مسوولیتونو خبرې وکړې.
نوموړي ټینګار وکړ، چې د تعلیمي چارو د ښه والي، د پلانونو د اغېزمن تطبیق او د ښوونیزو موخو د ترلاسه کولو لپاره باید ټول مسوولین خپلې دندې په پوره ژمنتیا او همغږۍ ترسره کړي.
همداراز د ښوونې او روزنې محترم معين د اروزګان ولایت د پوهنې له مسوولینو وغوښتل، چې د پلاوي د سفر د پروګرامونو په تطبیق، د ښوونیز وضعیت په ارزونه او د فعالیتونو په څېړنه کې لازمه همکاري وکړي، څو د پوهنې په برخه کې د شته چارو بهیر لا پیاوړی او د فعالیتونو کیفیت لا ښه شي.
