د پوهنې وزارت د کیفیت تضمین معین په کاري سفر فاریاب ولایت ته ورسېد
د پوهنې وزارت د کیفیت تضمین معین الحاج مولوي عبدالخالق صادق په رسمي سفر فاریاب ولایت ته ولاړ.
نوموړي په داسې حال کې چې د فاریاب ولایت د پوهنې مشرتابه له لوري یې ملتیا کېدله، د یاد ولایت د مقام له مرستیال، د علماوو شورا رئیس او د دغه ولایت قومي مخورو سره وکتل.
د پوهنې وزارت معین د یاد ولايت په شيرين تګاب او کوهستان ولسواليو کې د دوه بابه مدارسو د تاسیس لپاره د مناسب ځاى د ټاکلو په باب چې د پوهنې وزارت له خوا منظور شوې دي؛ خبرې او د نظرونو تبادله وکړه او په دې برخه کې یې د فاریاب ولایت له رهبرۍ د همکارۍ غوښتنه وکړه.
له بلې خوا د ولايت د مقام مرستيال او د علماوو شورا رئيس د پوهنې وزارت د دغه نېک اقدام ستاينه وکړه، دا یې د اسلامي زده کړو د پراختیا په برخه کې يو مهم قدم وباله او د پوهنې وزارت له مشرتابه يې مننه وکړه.
په ورته مهال په یاده کتنه کې د فاریاب ولايت د مقام مرستيال د پوهنې وزارت مشرتابه ته د دغه وزارت د پلانونو او پروګرامونو د پلي کېدو په برخه کې د خپل ملاتړ ډاډ ورکړ.
