د پوهنې وزارت سرپرستې د بدخشان ولایت د ګجر قوم له مشرانو سره وکتل
د پوهنې وزارت_کابل: د پوهنې وزارت سرپرستې آغلې رنګینې حمیدي، د بدخشان ولایت د ګوجر قوم له یو شمېر مشرانو او مخورو خلکو سره په خپل کاري دفتر کې وکتل.
د ګجر قوم مشرانو او مخورو د پوهنې وزارت له رهبرۍ څخه ملاتړ وکړ، او د یاد قوم د پوهنې په برخه کې ځینې ننګونو او نیمګړتیاو په اړه لکه د ښوونځيو، د ښوونکو ، د درسي کتابونو کمښت اود یو شمیر نورو مواردو په اړه خپل وړاندیزونه او غوښتنې د پوهنې وزارت له مشرتابه سره شریکې کړې.
د بدخشان ولایت د ګجر قوم مشرانو وویل: تر دې دمه د دې ولایت اقلیتونو ته لازمه پاملرنه نه ده شوې او د پوهنې وزارت له مشرتابه څخه یې وغوښتل چې د دوی ستونزو د حل په موخه اقدام وکړي.
د پوهنې وزارت سرپرستې د بدخشان ولایت د ګجر قوم مشرانو سره ژمنه وکړه چې د پوهنې په برخه کې به د ستونزو او نیمګړتیاو د حل لپاره کار وکړي.
آغلې حميدي د بدخشان ولايت د ګجر قومي سپين ږيرو اومخورو څخه وغوښتل چې د پوهنې په برخه کې له خلکو سره کار وکړي او د عامه پوهاوي له لارې يې ذهنونه روښانه کړي ځکه د پوهنې وزارت د سرپرستې په باور د پوهنې نظام برياليتوب د خلکو د همکارۍ او همغږۍ پرته پرمخ نشي تلای.
