د پوهنې وزارت سرپرست کندهار ولایت ته رسمي سفر وکړ
د پوهنې وزارت سرپرست الحاج مولوي حبیب الله آغا او ورسره مل پلاوی د خپلو ولایتي سفرونو په دوام، چې د هېواد د ولایتونو د پوهنيز وضعیت د ارزونې په موخه يې ترسره کړي، نن کندهار ولایت ته ورسېد.
په هغه کتنه کې چې د پوهنې وزارت سرپرست د کندهار ولایت له پوهنې رئیس الحاج مولوي فخرالدین نقشبندي سره درلوده، دواړو لوریو د دغه ولایت د پوهنيز وضعیت په تړاو بحث او نظرونه تبادله کړل.
د پوهنې وزارت سرپرست د ياد وزارت د وروستیو کړنو د بيانولو په ترڅ کې د مدارسو لپاره د ټاکل شوي ښوونیز نصاب پر پلي کېدلو ټینګار وکړ.
نوموړي وويل، په ولايتونو کې د ښوونيزو چوپړونو لاښه والي په موخه، يو لړ بنسټيز پلانونه په لاس کې لري، چې عملي چارې يې پيل شوې دي.
ورپسې د کندهار ولایت پوهنې رئیس ياد ولایت ته د پوهنې وزارت د لوړ پوړي پلاوي ورتګ ته ښه راغلاست ووایه او د دغه ریاست د پلانونو، دندو او نورو کړنو په اړه یې د پوهنې وزارت مشرتابه ته هر اړخیز معلومات وړاندې کړل، چې د مشرتابه پلاوي له لوري يې تود هرکلی وشو.
په ياده غونډه کې د پوهنې وزارت د سرپرست له لوري د دغه ولایت پوهنې مشرتابه ته یو شمېر لارښوونې ترسره شوې.
