د پوهنې وزارت له لوري د سویې د تثبیت آزموینه واخيستل شوه
د افغانستان.ا.ا. د یوشمېر مجاهدینو څخه، چې خپلې زده کړې یې په شخصي توګه ترسره کړې وې، د سویې د تثبیت آزموینه واخیستل شوه.
په یاده پروسه کې د کورنیو چارو وزارت له ۴۲۵ تنو منسوبینو څخه، آزموینه واخیستل شوه.
د آزموينې بهير د قرآن کریم د څو مبارکو آيتونو په تلاوت سره پيل شو، ورپسې د پوهنې وزارت د آزموينو د کمېټې رئيس مولوي عبدالواحد واحديار مېلمنو ته د ښه راغلاست ويلو پرمهال، د ياد بهير په اړه معلومات وړاندې کړل.
نوموړي له ګډون والو وغوښتل، ترڅو له شته فرصتونو څخه اعظمي ګټه پورته کړي او د خپلو زده کړو د دوام لپاره جدي هلې ځلې وکړي.
په ورته مهال د کورنیو چارو وزارت اداري معین مل پاسوال الحاج شیخ محمد طاهر حلیم او د یاد وزارت د ښوونیزو او تحصیلي چارو د انسجام رئیس لوی پاسوال مولوي محمد رحمان اخلاص، په خپلو خبرو کې د ښوونې او روزنې په ارزښت خبرې وکړې او له ګډون والو یې وغوښتل چې د خپلو زده کړو په سر ته رسولو کې زیاتې هلې ځلې وکړي تر څو خپلو خلکو او هېواد ته د ښه خدمت جوګه شي.
په پام کې ده چې ګډون وال به له ارزونې او د معیاري نمرو له ترلاسه کولو وروسته، د ښوونځیو په لسم او یوولسمو ټولګیو کې شامل شي.
