د پوهنې وزارت محترم سرپرست د پکتیکا ولایت له امام بخاري «رح» درالایتام څخه لیدنه وکړه
د پوهنې وزارت سرپرست محترم الحاج مولوي حبیب الله آغا او ورسره مل پلاوی، چې د پکتیکا ولایت د تعلیمي وضعیت په ارزونه بوخت دی، د یاد ولایت پوهنې ریاست مسئولینو او یو شمېر علماءکرامو په ملتیا، د امام بخاري «رح» دارالایتام څخه لیدنه وکړه او د زده کوونکو د تعلیمي وضعیت او علمي کچې ارزونې پرمهال یې د اړوندې ادارې له مهتممینو او طالب العلمانو سره وکتل.
د پوهنې وزارت محترم سرپرست په خپله وینا کې د هېوادبچیانو، په ځانګړي ډول د یتیمو او اړمنو ماشومانو لپاره د تعلیمي آسانتیاوو برابرولو ته په اشارې سره وویل: "په ټول هېواد کې د متوازنو ښوونیزو او روزنیزو چوپړونو وړاندې کول چې زموږ د پلانونو او دندو په سر کې ځای لري، د یاد وزارت له لومړیتوبونو څخه دي او موږ به په یاده برخه کې خپلې هلې ځلې لاپسې ګړندۍ کړو.
نوموړي زیاته کړه: " د بې سرپرسته او یتیمو ماشومانو سالمه ښوونه او روزنه خپله دیني او ملي دنده ګڼو او ورته ژمن یو."
ورپسې د ذکرشوي دارالایتام چارواکو هم د پوهنې وزارت د محترم مشرتابه له ورتګ تود هرکلی وکړ او په دې برخه کې یې د پوهنې وزارت محترم سرپرست له هڅو قدرداني وکړه.
په پای کې، د یاد دارالایتام مسئولینو یو لړ وړاندیزونه او ستونزې هم د پوهنې وزارت له محترم مشرتابه سره شریکې کړې، چې د محترمې رهبرۍ لخوا ورته د ستونزو په حل کې د همکارۍ ډاډ ورکړل شو.
