د کابل ښار اړوندو ښوونځیو د زدهکوونکو سپورټي لوبډلو فوټسال سیالۍ د اماني لیسې په سپورټي جمنازیوم کې پیل شوې
د پوهنې وزارت د اساسي او ثانوي زده کړو ریاست د بدني روزنې آمریت له پلان سره سم، د کابل ښار د ۲۸ بابه ښوونځیو د زدهکوونکو سپورټي لوبډلو ترمنځ د فوټسال سیالۍ د اماني لېسې په سپورټي جمنازیوم کې پرانیستل شوې.
د یادو سیالیو د پرانیستې په مراسمو کې، چارواکو د دغه ریاست د پلانونو او سپورټي پروګرامونو په اړه خبرې وکړې او ویې ویل چې پوهنې وزارت د ځوانانو روغتیا او هوساینې او په هېواد کې د تعلیمي مرکزونو د زدهکوونکو ترمنځ د سپورټ ودې ته جدي پام کوي.
همدارنګه د یادو سیالیو په لومړي پړاو کې، کله چې د اماني او علامه فیض محمد کاتب لېسو د زدهکوونکو لوبډلې له یو بل سره مخامخ شوې، د اماني لېسې لوبډله ۱-۰ ګټونکې اعلان شوه.
په ورته مهال د محمد علم فیض زاد او سید اسماعیل بلخي لېسو د زدهکوونکو ترمنځ لوبه، د سید اسماعیل بلخي لیسې په ګټه پای ته ورسېده.
دغه سیالۍ به په راتلونکو څو ورځو کې د پورته ذکر شویو ښوونځیو د زدهکوونکو د سپورټي لوبډلو ترمنځ دوام وکړي او په پای کې به ګټونکې لوبډلې د سپورټي کپونو په ورکولو سره وهڅول شي.
