د کابل ښار د پوهنې رئیس او اداري او مالي آمر ته دریمه درجه تقدیرنامې ورکړل شوې
د کابل ښار د پوهنې رئیس مولوي احسان الله خطاب او د مالي او اداري چارو آمر مولوي محمد اسحق مقدس ته د دوی د غوره خدمتونو، په اړوندو چارو کې د نه ستړې کیدونکو هلو ځلو او ښو لاسته راوړنو له امله د یوې غونډې په ترڅ کې د پوهنې وزارت د مقام له لوري دریمه درجه تقدیرنامې ورکړل شوې.
په یاده غونډه کې د پوهنې وزارت د کیفیت د تضمین معین الحاج مولوي عبدالخالق صادق او د یاد وزارت ځینو نورو رئیسانو، آمرینو، مدیرانو او کارمندانو برخه درلوده.
غونډه د قرآن عظیم الشان د څو مبارکو آیاتونو په تلاوت سره پیل شوه. ورپسې د کابل ښار د پوهنې رئیس مولوي احسان الله خطاب د پوهنې وزارت څخه راغلي پلاوي ته د ښه راغلاست ترڅنګ د دوی له تشریف راوړلو څخه مننه وکړه.
وروسته د کیفیت د تضمین معین الحاج مولوي عبدالخالق صادق وینا وکړه، نوموړي د کابل ښار د پوهنې د رئیس او د مالي او اداري چارو د آمر فعالیتونه او غوره خدمتونه وستایل او د وزارت په استازیتوب یې دا تقدیر د پوهنې وزارت د ټولو منسوبینو لپاره ویاړ وباله.
وروسته د پوهنې وزارت د داخلي پلټنې رئیس مولوي محمدصابر معتصم بالله هم د خپلې وینا په ترڅ کې د کابل ښار د پوهنې رئیس او د مالي او اداري چارو د آمر کړنې شفافې، بې پرې او په اصولو برابرې وبللې او د پلټنې په مهال یې د دوی همیشنۍ همکاري وستایله.
د غونډې په پای کې د پوهنې وزارت منظور شوي مکافات د یاد وزارت د مسئولینو له لوري یادو کسانو ته وسپارل شول او غونډه د دعائیې په لوستلو سره پای ته ورسېده.
