لغمان کې د کاکڅ د هلکانو ښوونځي لپاره جوړه شوې ودانۍ ګټې اخیستنې ته وسپارل شوه

د پوهنې وزارت_لغمان: د لغمان ولایت د قرغیو ولسوالۍ د کاکڅ د هلکانو ښوونځي نوې جوړه شوې ودانۍ د پټۍ په پرېکولو سره ګټې اخیستنې ته وسپارل شوه.
په هغه غونډه کې چي په همدې موخه د یاد ښوونځي په انګړ کې جوړه شوي وه ، د لغمان والي ښاغلي محمد اصف ننګ، د کډوالو او بېرته را ستنېدونکو چارو وزارت مالي او اداري مرستیال احمد ولي حکمي، افغانستان لپاره د (UNHCR) ادارې مرستیال السټر بولټن او د پوهنې ریاست مسوولینو برخه اخیستې وه.
د یاد ولایت د پوهنې رییس عبدالله حمیدي وايي، د یاد ښوونځي ودانۍ په پاخه او اساسي ډول په یو پوړ کې د څه د پاسه ۱۴ میلیونو افغانیو په مجموعي لګښت (UNHCR) اداري په مالي مرسته د ۶ میاشتو په موده کې جوړه شوي ، چې ۸ درسي ټولګي ، ۲ اداري خونې ، د احاطې دېوال، د اوبو څښلو څاه، د زده کوونکو لپاره ۱۶۰ پایې مېز او څوکۍ او نورې اړوندې ښوونیزې آسانتیاوې لري.
د لغمان والي د (UNHCR) له ادارې څخه مننه وکړه چې په دې ولایت کې د پوهنې، روغتیا او ګډوالو په بېلا بېلو برخو کې لازمې او ښې مرستې ترسره کړي
هغه دغه راز په ختیځ زون کې د (UNHCR) ادارې له همکارانو څخه هم مننه وکړه چې په پوره هماهنګۍ سره لغمان کې خپل خدمات مخته وړي.
همدارنګه د کډوالو او بېرته راستنېدونکو چارو وزارت اداری معین احمد ولي حکمي هم د (UNHCR) له اداري څخه د مننې سربېره له دوی غوښتنه وکړه چې په ورته نورو برخو کې هم خپلو مرستو ته دوام ورکړي
افغانستان لپاره د (UNHCR) ادارې مرستیال السټر بولټن په خپلو خبرو کې خوښي وښوده چې د مسوولینو د غوښتنې او د زده کوونکو اړتیاوو ته په کتو یې د کاکڅ د هلکانو د ښوونځي ودانۍ جوړه کړه.
هغه دغه راز ژمنه وکړه چې د څښاک د پاکو اوبو، د ښوونځیو سره د هر اړخیزې مرستې او د کډوالو په برخه کې به خپلو مرستو دوام ورکړي.