له ولایاتو څخه د پوهنې لنډ خبرونه

بدخشان:
د ازموینو د ملي ادارې د لارښوونې پر اساس د هلکانو د دیني علومو او د شپې لیسې د فارغینو د کانکور ازموینه او د هغوی د بایمتریک پروسه د لوړو زده کړو وزارت د پلاوي او د بدخشان پوهنتون د رئیس او د دغه ولایت د پوهني ریاست د استازو په حضور کې په رسمي مراسمو کې په یوه ارامه او شفافه فضا کې پیل شوه..
پکتیکا:
د پکتيکا ولايت د ګيان ولسوالۍ د رياض العلوم د سيمه ييزې مدرسې د زده کوونکو د فراغت په مناسبت د دې ولسوالۍ د پوهنې مسوولينو، ديني عالمانو او قومي مخورو په شتون کې يوه ستره غونډه جوړه شوه.
ګډونوالو ټولو فارغانو ته مبارکي وويله او د روښانه راتلونکي او لا برياوو هيله يې ورته وکړه.
بیا هم په یو بل خبر کې:
د همدې مدرسې د بیارغاونې چارې د هیومن اپیل موسسې له خوا بشپړ او د یو لړ مراسمو په ترڅ کې ګټې اخیستنې ته وسپارل شوې.
بدخشان:
د بدخشان ولايت د پوهنې رئيس مولوي محراب الدين اقبال له خپلو کارکوونکو سره یې سکتوري غونډه وکړه.
د دې ولایت د پوهنې ریس د مرستندویو بنسټونو له مرستې څخه د مننې تر څنګ د١٤٠٢ کال لپاره د پرمختيايي پلان د عملي کولو، د ولایتي پروفایل د چمتو کولو، د نتایجو د مدیریت لپاره د یوه منظم ارشیف د رامنځته کولو او د اړتیاو پر اساس د پرمختیایي برنامو د جوړولو په باب يې د غونډې له ګډونوالو سره خبرې وکړې.
نورستان:
د نورستان ولايت د پوهنې رئيس مولوي تاج محمد مطمين د دې رياست له کارکوونکو او مسوولينو سره په کتنه کې د دغه ولايت د پوهنې په برخه کې د وروستيو لاسته راوړنو په اړه معلومات ورکړل او د خپلو همکارانو له نه ستړي کېدونکو هلو ځلو يې مننه وکړه. په پاى کې ګډون کوونکو خپلې کاري ستونزې له ښاغلي معتصم سره شریکې کړې او د حل غوښتنه يې ورڅخه وکړه.
هرات:
د هرات ولايت د پوهنې رئيس مولوي عبدالله اميني د دې ولایت د ديني مدارسو له شپني او اختصاصي ازموينې څخه ليدنه وکړه او د اسلامي ټولنې د اړتياو په پام کې نيولو سره يې د دا ډول ازموينو اخيستل ضروري وګڼل.
 د يادونې وړ ده، چې دغه ازموينه په هرات پوهنتون کې ترسره شوه او په دې ازموينه کې د څلورو ولايتونو (هرات، نيمروز، فراه او بادغيس) زده کوونکو برخه اخيستې وه.