له ولایتونو د پوهنې په اړه څو لنډو خبرونو ته کتنه
پروان
د پروان ولایت د پوهنې ریاست مسؤلینو ترمنځ غونډه وشوه.
په ياده غونډه کې د همکارو ادارو مسؤلینو د خپلو شته فعالیتونو او لاسته راوړنو يادونه وکړه او خپل راتلونکي پلانونه یې له ګډون والو سره شریک کړل.
د دغه ولايت د پوهنې رئيس مفتي محمد حسن حقاني د غونډې له ګډون والو وغوښتل، چې د پلانونو د پلي کېدو په برخه کې دې له رياست سره همکاري وکړي.
کندز
د کندز ولایت د پوهنې رئیس الحاج محمد اسماعیل ابو احمد په دغه ولایت کې د ج/هادي مدرسې له اداري، تدریسي او د ليليې فعالیتونو څخه څارنه وکړه او مسؤلینو ته یې د درسونو د کیفیت د ښه والي او د لیلیې او نورو څانګو د لګښتونو خوندي کولو په اړه لازمې سپارښتنې وکړې.
پنجشیر
د پنجشیر ولايت د پوهنې رياست د اسلامي زده کړو آمريت له اړوندو مسوولينو سره د يوې مشورتي ناستې په ترڅ کې د اداري چارو د چټکتيا او د زده کوونکو لپاره د تدريس د عملي کولو، د کار په بهير کې د اسانتياوو رامنځته کولو، د استادانو ظرفيتونو د لوړولو او د تشکيلاتو د سمون په اړه خبرې وکړې.
د ياد ولایت په ټولو ولسوالیو کې د نویو مدارسو د جوړښت په اړه نظرونه تبادله شول.
لوګر
د لوګر ولایت د پوهنې ریاست غونډه د دغه ولایت د پوهنې رئیس مولوي جنت ګل عزیز تر څارنې لاندې د ۱۲ ا/مارتي ادارو د استازو او همکارانو په ګډون جوړه شوه.
په دې ناسته کې د لوګر له پوهنې سره د همکارو ادارو مسوولینو خپل تطبیق شوي پلانونه او روان پروګرامونه وړاندې کړل او د کاري اسانتیاوو د برابرولو غوښتنه یې وکړه.
د دغه ولايت د پوهنې رياست رهبري د يادو ادارو د همکاريو قدرداني وکړه او له هغوی يې وغوښتل، چې د پوهنې رياست سره په همغږۍ خپل فعاليتونه ترسره کړي.
لغمان
د لغمان د الینګار ولسوالۍ د پوهنې امر د یادې ولسوالۍ د ښوونځيو له مدېرانو سره د لیدنې پر مهال د ښوونکو د معاشونو د ستونزو په اړه لازمې لارښوونې وکړې.