نیمروز ولایت کې د ۲۸۹ زره امریکایي ډالرو په لګښت د یو باب ښوونځي نوې ودانۍ پرانیستل شوه
د نیمروز ولایت مرکز اړوند د مهاجر آباد په کلي کې د شهید عبدالله عالي لېسې د نوې ودانۍ رغنیزې چارې بشپړې او د یاد ولایت د پوهنې رئیس الحاج مولوي ګل احمد حقاني، د کډوالو چارو رئیس، علماءکرامو او قومي مخورو په حضور کې ګټې اخیستنې ته وسپارل شوه.
د ښوونځي دغه نوې ودانۍ د یو همکار بنسټ له لوري د ۲۸۹ زره امریکایي ډالرو په ارزښت، د (۲۳۴۱) متره مربع مساحت سره په دوو پوړونو کې چې ۱۶ درسي ټولګي، ۴ اداري، لابراتوار او کمپیوټر خونې له نورو اړینو ملحقاتو سره لري، جوړه شوې ده.
د نيمروز پوهنې رئيس د ياد ښوونيز بنسټ پرانیستلو پر مهال، د پوهنې وزارت د ښوونيزو پروګرامونو په اړه معلومات وړاندې کړل او له خلکو يې وغوښتل چې خپل اولادونه د علم او پوهې لپاره مدارسو او ښوونځيو ته واستوي.
نوموړي زياته کړه، د دغه ښوونځي په جوړېدو سره د سيمې د زده کوونکو ستونزې په بشپړه توګه هوارې شوې او له مسئولينو او زده کوونکو يې وغوښتل چې د خپل ښوونځي د ودانۍ او وسايلو ساتنې ته جدي پاملرنه وکړي.
له بلې خوا د سیمې خلکو د یادې موضوع په اړه خبرې وکړې او د پوهنې وزارت له پلانونو يې خپل ملاتړ اعلان کړ.
