په بلخ ولایت کې د یوې دیني مدرسې د بنسټ ډبره کېښودل شوه
د پوهنې وزارت سرپرست الحاج مولوي حبیب الله آغا له لوري، د بلخ ولایت نهرشاهي ولسوالۍ په ګوری مار کلي کې د یوې دیني مدرسې د بنسټ ډبره کېښودل شوه.
په یادو مراسمو کې د پوهنې وزارت سرپرست، د پوهنې رئیس مولوي عبدالجلیل شهید خېل، د یادې ولسوالۍ رهبري، علماوو، د مدرسې استادانو او زده کوونکو ګډون درلود.
مراسم د قران عظیم الشان د څو مبارکو آیتونو په تلاوت سره پیل شول، ورپسې د بلخ ولایت پوهنې رئیس د پوهنې وزارت سرپرست او ورسره پلاوي ته ښه راغلاست ووایه.
د یادې مدرسې ودانۍ د پوهنې دوستو خلکو په مالي لګښت سره په يو نيم جرېب ځمکه کې د يو لک او پنځوس زره امريکايي ډالرو په لګښت جوړيږي، چې د دارالعلوم او دارالحفاظ په برخو کې ۱۲۰ ښځینه زده کوونکې،۱۳۰ تنه لیلیه زده کوونکي او ۲۶۰ تنه نهاري زده کوونکي په یاده مدرسه کې زده کړې کوي.
د پوهنې وزارت سرپرست د یاد ولایت د نهرشاهي ولسوالۍ د شریفو ولسونو له مرستو چې د یادې مدرسې جوړولو ته یې ځانګړې کړې وې، مننه وکړه او په خپلو خبرو کې یې د هېواد په پرمختګ کې د دیني او عصري علومو د ارزښت په باب خبرې وکړې.
د پوهنې وزارت سرپرست څرګنده کړه: له بده مرغه په تېرو حکومتونو کې د اسلامي زده کړو په برخه کې هېڅ کار نه دی شوی، مدرسې ورانېدلې او حتی د علماوو او پوهانو درناوی نه کېده، خو اوس الحمدلله، د .ا.ا.په راتګ سره د اسلامي زده کړو برخې ته جدي پاملرنه شوې او د هرې ورځې په تېرېدو سره د هېواد په هر ګوټ کې د ښوونځيو، مدارسو، دارالعلومو او دارالحفاظونو جوړولو په برخه کې جدي هلې ځلې روانې دي او د پوهنې وزارت رهبري د پوهنې په برخه کې د ګرانو هېوادوالو د ټولو کړنو او پروګرامونو څخه ستاینه او ملاتړ کوي.
د پوهنې وزارت د سرپرست له ارزښتناکو لارښوونو وروسته، یو شمېر علماوو او د پوهنې مینه والو په ټولنه کې د اسلامي زده کړو د ارزښتناک رول په اړه مفصلې خبرې وکړې او د پوهنې وزارت له پلانونو یې خپل ملاتړ څرګند کړ.
یاد مراسم د پوهنې وزارت د سرپرست او ورسره مل پلاوي له لوري د مدرسې د ودانۍ د ډبرې په اېښودلو او د خیر په دعا پای ته ورسېدل.
