په فاریاب ولایت کې د یو باب ښوونځي ودانۍ پرانیستل شوه
د فارياب ولايت المار ولسوالۍ اړوند په سرچشمه غلبله کلي کې، د تيموري د هلکانو لومړني ښوونځي د ودانۍ چارې بشپړې او د پوهنې رياست د مشرتابه پلاوي، علماء کرامو او قومي مخورو په ګډون د يو لړ مراسمو په ترڅ کې پرانيستل شوه.
د ښوونځي دغه ودانۍ چې ۱۳ درسي ټولګي، یوه دفتري خونه، یو لابراتوار، یوه ژوره څاه، د اوبو یوه زېرمه، ۱۰ تختې د لمریزې برېښنا ښيښې، ۲۴۷ سېټه مېزونه-- څوکۍ او نور اړین محلقات لري؛ د ۲۴ اعشاریه ۲ میلیونه افغانیو په لګښت د یو همکار بنسټ په مالي مرسته جوړه شوې ده.
د فاریاب پوهنې رئيس الحاج مولوي سيد حفيظ الله معتصم بالله، د یاد مرسته کوونکي بنسټ څخه د مننې په ترڅ کې، د پوهنې پر اهميت او د هېواد بچيانو لپاره د علم او پوهې د زده کړو په برخه کې د آسانتيا په برابرېدلو خبرې وکړې او له خلکو يې وغوښتل، تر څو خپل ماشومان د ښوونې او روزنې ترلاسه کولو په موخه یاد ښوونځي ته واستوي.
نوموړي د مسئولینو او زده کوونکو له لوري د ښوونځي د وسایلو پر ساتنې او پالنې ټینګار وکړ.
