په هرات ولایت کې د یوه لومړني ښوونځي د بنسټ ډبره کېښودل شوه
د متوازن ښوونیزو او روزنیزو خدمتونو د وړاندې کولو او د هېواد د ماشومانو لپاره د لازمو ښوونیزو اسانتیاوو د رامنځته کولو په موخه د هرات ښار د شپږمې ناحیې په جیلاني ښارګوټي کې د اتحاد جیلاني لومړني ښوونځي د بنسټ ډبره کېښودل شوه.
د یاد ښوونځي په مراسمو کې د هرات د پوهنې رئیس مولوي عبدالله اميني، د پوهنې ریاست مسوولینو، يو شمېر علماوو او مخورو شخصيتونو، ښوونکو او زده کوونکو برخه اخيستې وه.
په دې مراسمو کې د دغه ولایت د پوهنې رئیس د ښوونځيو جوړول او د علم زده کړه یې د ماشومانو مسلم حق وباله او په دې برخه کې يې د لا زياتې مرستو ژمنه وکړه.
د پوهنې رئيس د هېواد د پوهنې له نظام څخه د ملاتړ په موخه د هرات د خېرخواه شخصیتونو له مرستو او ملاتړ څخه هرکلى وکړ او له نورو يې وغوښتل، چې د پوهنې د ودې او پرمختګ او د پوهنې د پراختيايي پروګرامونو په پلي کولو کې له هر راز مرستو څخه ډډه ونه کړي.
د مسوولینو په وینا؛ ياد شوی ښوونځی د حاجي غلام محمد جيلاني له لوري په ۱۴۰۰ متر مربع مساحت ځمکه کې جوړیږي، چې ۸ درسي خونې لري.
د یادونې وړ ده، چې د دې ښوونځي د ودانولو ټول لګښت به د یاد ولایت د علمي شخصیت الحاج عبدالرحمن نیکبین لخوا ورکول کیږی.
